Haüt is es schüa, der Himmel is blau,

Die Sunn scheint un mir hömm Zeit.

Mach nit lang rüm, steich ei, mir 

Foan loas. Zum Kraüzbarch nauf is nit weit.

 

Kennst Du 'n Dreistelz düwe bei Modlos,

Kennst Du 'n Löserschhag?

Gleich foar mer zom noach Wildflecke nü;

Dos isn schüane Waag.

 

Guck doch, der Himmeldunk läit doa vurne,

Gleich bei der hoache Höll;

Un dann der Daüfelsbarch nawedroo,

Doanauf will ich nou schnell.

 

Jetz wu mer souwiesou aufm Waag sen,

Foar mer noach Gersfeld durch.

Muan will ich dann zur Maulkuppe nü

Un nauf die Milseburg.

 

Haüt scheint die Sunn, der Himmel is blau,

Om Kraüzbarch doa is es schüa.

Un mir höm Zeit un höm zu uns gsocht:

Haüt foar mer amoa nei die Rhüa.

Die Irma aus Schwirzelboch kenn ich seit 14 Dooch.

Ich hatt bloaß zu ihr nügeguckt un bin gleich zomgezuckt.

Doas wär die Richtige, hob ich mer gsocht,

Ower sie hoat nit mitgemocht.

 

Die Rosi aus Aura is ach a schüane Fraa.

Naülich, beim Fohrrodfoan, hob ich se widder g'sahn.

"Wär dos wos mit uns zwee?" hob ich gfräacht,

Ower sie hoat sich bloaß rümgedräat.

 

Die Erika aus Katzemich hoat gleich gfräacht: "Buhar kenn ich dich?"

Doa bin ich langsam hiegerückt, hob mich a fest noogedrückt

Un hob zu ihr gsocht: "No, du brauchst n Moo?!",

Ower sie springt auf und rennt devoo.

 

Die Edeltraud aus Weyersfeld hatt mich auf Sunndich früh bestellt.

Drei Stunn höm'r rümgeredt, dann hob ich's d'rauf hiegeledd:

Hob se gfräacht: "No, wäar ich für dich racht?",

Ower sie hoat mich nur ausgelacht.

 

Zur Monika aus Öscherout hatt ich mich lang nid hiegetraut.

Eemoa hob ich's doch probiert, bin grood zu ihr naufmarschiert.

Sie guckt vom Fenster roo und seichts grood naus:

"Naa, mir künnt kenn Moo nein Haus!"

 

Letzt hob ich k'höat, die Hildegard aus Lohr wöat scho seit fünef Joahr.

Ob se nid enner nehmt? No dann, dosmoa klappts bestimmt.

Ich foahr gleich loas, es wird niasmer gewoat,

Jetz houl ich mer die Hildegard.

Michelsmoat in Hammelburch, mir drängeln uns zwüschedurch,

Gugge woas ze käffe git, wos mer bräüche namme me mit.

 

Klääderbüüchl, Muggebötsche, Miistgobl, Goartereche,

Laaderiame, Mäüsfalle, Kierzeständer, Gürtlschnalle,

Stopfnoodl, Teppichklopfer, Öpfelsbrecher, Gummistopfer,

Wuaschtbennel, Broatwuaschtzange, Floscheputzer, Millichkanne,

Töpfgratzer, Suppeschüssel, Schildkappe, Schraubeschlüssel,

Butzämmr, Bettvüürläicher, Schnupftabak un Housedreicher.

 

Üm uns rüm is ää Gedrück, es gäet nid vür un nid zurück.

Manchmoa enner, dan ich kenn,wos dos sust für Läüt nou sen.

 

Viahändler, Bierbrauer, Schnapsbrönner, Wengertsbauer,

Autohändler, Schloatfaacher, Fernfoahrer, Kürbmacher, 

Baggerführer, Bauarbeiter, Holzschnitzer, Damenschneider,

Hünnerzüchtr, Ingenieure, Doochdecker un Frisöre, 

Uhrmacher, Scharschleifer, Fotografe, Eisverkäüfer,

Gäülsdouktr, Krankeschwester, vurne droo der Bürgermester. 

 

Semmer üwen Moat gelaffe, mäicht uns noat der Bauch ze schaffe,

Hömmer Duascht un Oppetit, gugge amoa wos sou alles git.

 

Kasebroat un Schwoaddemooche, wenn mersch haüt aa nit verdrooche,

Faaderweise, Zwiebelblootz, Kuche, Kaffee mit viel Sootz.

Limenaad un Frangeschuppe, Häifebraand, Grumbiansuppe,

Zwötschgewasser, Öpfelmoust, Kühmillich, die sust nias koust.

Saure Haring, Laberwuascht, Zuckerweck un Bier fürn Duascht,

Floschewasser, Mineralien, früsche Pizza aus Italien.

Mein vüäddere Nochber, der Grechor, 

dos is’n stottliche Moo.

Fleißich un gscheit is’r aa nou, 

wu wos loas is, stiäht er gadlich hinnedroo.

 

Letzt künnt doa der Grechor im Oozuch, 

ich hatt’n fei goarni’ gekennt,

Er hoat sou geguggt un sou ausgsann,   

wie der naüe Bundespräsident.

 

Än Grechor sei Flamme hässt Hertha, 

mä siäht se goar manchmoal ze zwätt.

Un ich mä als, die Hertha verstäht aa,   

wos der Grechor sou gscheit mit uns red.

 

Die Hertha is ä bissle verschouwe, 

sie hoat öwer ä schüäne Frisur, 

Un nit neer bloas vo ouwe,  

naa, aa vo unne ä gsunde Statur.

 

Der Grechor wär garn Bürchermäster, 

ower die Hertha hatt’s schnell ausgered,

Weil als Bürchermäster doa müässt er,    

jed’n Dooch ümmer früh bal ausn Bett.

 

Seit mein Grechor als Bürchermäster im Gspräch woar, 

is alles ä bissle verdräaht.

Für ä groaß Auto mues er jetz Geld spoar,    

un har guggt racht gscheit un gelehrt.

 

Die Hertha jückts uffm Buckel, 

„och Grechor, du müässt mich ämoa gratz“,

„Ower du hoast joa om Buckel n Hüggl,    

doa is dou zem Gratze kän Platz.“

 

Der Grechor schafft oo sein Läbbdopp, 

un schennt mit die Tastatur.

„Oh, dass halt iich grood soun Depp hobb“,    

gitn die Hertha retour. 

 

Dunkel woarsch düüwe beim Grechor, 

har is scho n siewe nein Bett.

Ar säicht zwoar, ar wöllt äweng Strom spoar,    

ich glää ower die Hertha hoadn widder verledd.

 

Mein Grechor, dar isst garn Spaghetti, 

die Hertha mouch liäwer Schoglaad.

Alle zwää denke se noach un mirke,    

ou, dos git joa zom’n Spagat.  

 

Der Grechor sitzt garn in sein Goarde, 

die Hertha, die huckt naawedroo,

Sie sitze un schwitze un woarte,   

wie annere Laüd in ihrm Büro.

 

Mein Grechor trinkt oäweds n Schubbe, 

die Hertha trinkt liäwer ä Bier.

Dann mennt se mer könnt ach doochsüwer    

ämoal ä Biersüpple ausprowier.

 

Die Hertha hoat wos om Mooche, 

der Grechor, dar hoats oo die Niern.

Zwe zwett hömse ä Litanei ze glooche,    

dass Dougter vo Mööche un Niern niäs verstiähn.

Ich woar sou in die Stuwe khukt, hob nauf n widder noo geguckt,

Un racht daütlich zeicht sich, ich braücht n naüe Deppich.

 

Ich hat’s n Teppichhändler gsocht, dehäm dann aa gleich Blatz gemocht,

Un nei die Stuwe schlepp ich, mein nochlnaüe Deppich.

 

Die Laüt, die höm scho drüü gered, dass ich n naüe Deppich hätt.

Drüm kumm hal un besüch mich, dann zeich ich der mein Deppich

 

Wenn ich oaweds dann im Bett liech, noat drämm ich vo mein Deppich

Dass ich uff mein Deppich gfliäh könnt, wie annere Laüt im Orient

 

Un bar sich uff mein Deppich läicht un mit sein Kuche Bröäsl mäicht,

dar denkt sich noat „Ou hätt ich, ner aa sou’n schüäne Deppich“.